Elkartasun Eguna egingo da Zegaman, San Bartolome jaietan

Ohartzerako, beste urte batez ate joka ditugu San Bartolome jaiak eta aurtengoan ere falta direnak gogoan, Elkartasun Eguna ospatuko da. Abuztuaren 29rako egun osoko egitaraua prestatu dute. Goizean goiz, mendi irteerarekin emango zaio hasiera egunari eta ondoren arratsaldean izango dira gainontzeko ekitaldiak.

Segurarrak eta zegamarrak, herri kiroletan
Zalantzarik gabe ikusmina piztuko du Segura eta Zegamako taldeen arteko herri kirol lehiak; iluntzeko 18:30ean hasiko da udaletxeko plazan. Ondoko probatan arituko dira bi taldeetako neska-mutilak: aizkoran, harri-jasotzen, txingatan, trontzan, koxkol biltzen eta korrika. Ondoren, Joxe Mari Esnaola herriko aizkolariak erakustaldia eskainiko du.
     Azken ostiralarekin bat eginez, euskal preso eta iheslarien eskubideen defentsan elkarretaratzea egingo da 20:00etan ohiko lekuan. Eta amaitutakoan, bertatik afalordura arte luzatuko den triki-poteoari emango diote hasiera.
    Afarirako txartelak Itzala tabernan egongo dira salgai hilaren 26ra arte. Entsalada, txerri sahieskia, postrea eta kafea izango da menua, edaria barne.