Espainiako Sustapen Ministerioak aitortu duenez, abiadura handiko
trenak (AHT) ez du denbora irabaztea apenas ekarriko EAEko hiriburuen
arteko bidaietan. Ministerioak, beraz, Jaurlaritzak orain arte emandako
datuak gezurtatu ditu eta "agerian utzi du, beste behin, AHTren obrak
gelditzeko unea dela", EH Bilduren iritziz.
Dani Maeztuk azaldu duenez,
"beti esan dugun moduan, proiektu horrek ez du inolako justifikazioarik;
ingurumena txikitzea dakar, ez du loturarik ziurtatzen ez iparrarekin
ez hegoarekin, diru publikoaren xahuketa besterik ez da eta orain
gainera azken aitzakia ere bertan behera erori zaie, AHTk ez duelako
abantaila nabarmenik ekarriko, errepide bidezko garraioarekin
alderatuta".
EH Bilduko legebiltzarkidearen esanetan, "ez Jaurlaritzak ez
espainiar Gobernuak ez dute proiektu horren kostu eta onurei buruzko
azterketa seriorik egin, eta milioika euro xahutu dituzte horren
ondorioz, behar sozialak asetzera bideratu beharrean. AHTk ez ditu
mugikortasun beharrak aintzat hartzen, konpainia zehatz batzuen interes
ekonomikoak baizik, eta Sustapen Ministerioak emandako azken datuek hala
frogatzen dute. Berriz ere salatu behar dugu, beraz, euskal jendarteari
proiektu hau inposatu zaiola konstruktora handien interes
ekonomikoengatik, ez interes sozialagatik".
iruzkinik ez:
Argitaratu iruzkina