GOIERRIKO HITZA. Gipuzkoako Foru Aldundiak hizkuntza irizpideak ezartzeko hartutako
erabakia bertan behera uzteko agindua eman du Espainiako Gobernuak.
Gainera, udaletako Euskara Planak bidaltzeko ere eskatzen ari da eta
errekerimenduak ere egin ditu. Guztira 38 herritan jaso dute agindua; Goierrin, Urretxuko, Legazpiko, Ordiziako eta Beasaingo udalek jaso
dituzte errekerimendu horiek.
Elkarretaratzeak
Kontseiluak elkarretaratzeak antolatu ditu
hainbat herritan gaur. Goierrin, Ordiziako plazan egingo dute 19:00etan.
Helburua, "estatuen eskuhartzea gelditu" eta "hemen guk erabakitzen
dugula argi uztea" dela azaldu zuten, besteak beste, Kontseiluko, AEK-ko
eta Goierriko udaletako zenbait ordezkarik, astelehenean, prentsaurrekoan.
Bertan azaldu zutenez, egoera horren aurrean, "euskaraz bizi nahi dugu
eta horretarako eskubidea dugu. Geure herrian euskaraz bizitzeko,
hizkuntza-politika eraginkorrak beharko ditugu", eta "euskalgintzako
eragileok herritarrak egunerokoan euskaraz bizitzeko hautua egiten
jarraitzera animatzen ditugu eta instituzioak euskaraz bizi gaitezen
neurriak hartzera". Bide horretan, euskalgintzak "hizkuntza-politika
eraginkorrak ezartzeko bidean urratsak ematen dituztenak basbesteko lan
egingo" duela eta "ondoan" izango dituztela ere azpimarratu dute.
Hizkuntza baten Normalizazio Prozesuak "dimentsio politikoa eta
soziala" duela azaldu zuten, eta normalizaziorako bidean martxan jarrita
dauden estrategia ezberdinetako batzuk dira hizkuntza irizpideak.
Euskal komunitateak "bere hizkuntza-politika definitzeko eta garatzeko"
eskubidea duela azaldu zuten, "inolako kanpo esku-hartzerik gabe".
Jatorrizko albistea: Elkarretaratzea Ordizian, hizkuntza irizpideen aurkako eskaeren aurrean
iruzkinik ez:
Argitaratu iruzkina