Elikagaien erosketa publikoan bertako eta gertuko produktuen
presentzia handiagoa izateko urratsa eman du gaur Legebiltzarrak, EH
Bilduk aurkeztu duen legez besteko proposamena onartuta.
Koalizioak EAJrekin adostu erdibideko testua, zeinak Jaurlaritzari
eskatzen dion "elikagaien erosketa publikoan azterketa bat egin dezala,
gertutasun, kalitate eta ingurumen irizpideak sustatzeko dauden aukerak
aztertzeko". Azterketa hori urtebeteko epean aurkeztuko da Ekonomiaren
Garapen eta Lehiakortasun batzordean. Ekimena aho batez onartu du
Legebiltzarrak.
IƱaki Lazarobaster legebiltzarkideak adierazi duenez, "urrats
garrantzitsua da eta norabide egokian, herri honen elikadura burujabetza
lortzeko bidean". "Izatez, administrazio publikoa da, entitate bezala,
elikagaien erosle nagusia, bere eskuduntzapeko azpiegituretan egiten
baita elikagaien erosketa handiena. Beraz, erosketa gaitasun nabarmena
du eta elikadura ohituretan zein ekonomian eragiteko indar ikaragarria",
azaldu du Lazarobasterrek, erakunde publikoek kudeatzen dituzten
ikastetxe, ospitale, kartzela, zahar-etxe eta abarrei erreferentzia
eginez.
Hala, EH Bilduk oinarrizkotzat jo du "elikagaien erosketa publikoan
eragitea, lehen sektorea indartzeko, lanpostuak sortzeko, merkatari
txikiak bultzatzeko, bertako ekonomia sustatzeko, landa ingurua
osasuntsu mantentzeko eta paisaia, kultura, gastronomia, zein nortasuna
garatzeko". "Elikadura burujabetza lortzea prozesu luze bat bezala
planteatzen dugu eta gaurko urrats bat egin beharreko bidean", gaineratu
du.
iruzkinik ez:
Argitaratu iruzkina