Hasier Arraiz: "Euskal bideari heltzeko ordua da, itzulezina izango den prozesua osatzekoa"

Erabakitzeko eskubidearen aldeko mobilizazioak egin dira Euskal Herriko hiriburuetan Katalunian galdeketa egiten ari diren egunean. Hasier Arraizek Donostian hitz egin du.


    Katalunian milaka herritarrek botoa eman duten bitartean, Hego Euskal Herriko hiriburuetan hainbat bildu dira erabakitzeko eskubidearen alde. Bilbon, Iruñean, Gasteizen eta Donostian elkarretaratzera deitu zuten. Ikurrinak eta Kataluniako banderak izan dira nagusi, eta guztien artean Iruñekoa nabarmendu da, bat egin baitute EH Bildu eta Geroa Bai koalizioek eta LAB, ELA, EHNE, CGT, EILAS eta ESK sindikatuek.
     Eragile horiek ohar batean azaldu dutenez, Espainiaren jarrera ez dator bat “nazioartean demokratikoak diren estatuek berezkoak izan behar dituzten jokabideekin”. Kanadak Quebecekin eta Erresuma Batuak Eskoziarekin izandako jarrera jarri zuten adibide gisa: “Uste dugu demokraziaren aroa iritsi dela; herriei zein herritarrei bideak ireki behar zaizkie beraien etorkizunaren inguruko erabakiak era demokratikoan har ditzaten”.
    Bitartean, Bartzelonan EAJko eta EH Bilduko ordezkariak batera agertu dira hedabideen aurrean. "Kataluniako herriari babesa eta elkartasuna adieraztera" azaldu dira EAJko eta EH Bilduko hainbat ordezkari. Tartean ziren Joseba Egibar GBBko presidentea, eta Pernando Barrena Sortukoa eta Rafa Larreina Amaiurreko diputatua Madrilen.