Dena prest erabakitzeko eskubidearen aldeko gizakaterako

Durangoko (Bizkaia) Landako gunearen aurrean hasiko da ekainaren 8an erabakitzeko eskubidearen alde egingo den giza katea, eta dozenaka lagun bildu dira han, Gure Esku Dago-k antolatutako egitasmo horren nondik norakoak azaltzeko. Durangotik Iruñeko Gaztelu plazara dauden 123 kilometro eskuz esku lotzeko erronka dute antolatzaileek. Teknikoki zaila da apustua, eta egunaren irudikapena egin dute herritarrek gaurkoan.

     Gure Esku Dago-ko kideek hainbat irizpide eman dituzte ekainaren 8ari begira: “Teknikoki bere zailatasunak ditu, eta garrantzitsua da arau batzuk jarraitzea”, adierazi du Angel Oiarbide plataformako kideak. Hausturarik gabeko giza katea osatu nahi dute, eta herritar bakoitzari egokitu zaion kilometrora joateko konpromisoa eskatu diote. Bestetik, egokitutako tokira garaiz heltzeko eta autobusez joateko deia egin dute: “Goizeko hamarretan bakoitza bere kilometroan egoteko deia eta autobusez joateko ahalegina eskatu nahi diegu herritarrei”, azpimarratu du Oiarbidek. Nabarmendu du garrantzitsua dela egunean bertan antolatzaile lanetan arituko direnen irizpideei kasu egitea.
     10:00etatik 11:30era bitarte katea prestatuko da, “era animatu eta ordenatuan”. Eta 12:00etan emango zaio hasiera, adarraren hotsarekin. Ordu erdiz, 123 kilometro milaka eskurekin lotuta egotea da duten asmoa. 12:30ean emango zaio bukaera kateari, eta, ondoren, Euskal Herriko bost herritan antolatu dituzten ekitaldietara joateko deia egin dute. 14:00etan hasiko dira ekitaldiak Durangon, Bergaran (Gipuzkoa), Lazkaon (Gipuzkoa), Etxarri Aranatzen (Nafarroa) eta Iruñean. Ekitaldien ondoren herrietan jai giroa izango dela iragarri dute Gure Esku Dago-ko kideek.
      Argi du Oiarbidek: “Erabakitzeko eskubidea duen herri baten aldarrikapena entzungo da ekainaren 8an. Argi ikusiko da herri bat garela eta herritarren garaia dela”.

• Jatorrizko albistea, Berrian: Dena prest erabakitzeko eskubidearen aldeko gizakaterako