Lazkao izango da Gure Esku Dagoren festaleku, ekainaren 8an

Ekainaren 8ko Iruñea-Durango giza-katea egin dadin hamar egun geratzen direnean, Gure Esku Dago ekimenak bildu ditu 123 kilometro eskuz esku helduta osatzeko lain partaide. Gutxienez 50.000 lagun beharko zirela aurreratu zuten hasieran, eta atzo baieztatu zuten badaudela, kopuru zehatzik eman ez arren.

    12:00etatik 12:30era gauzatuko da katea, errepideetan (11:00etatik 12:00etara bitartean kokatu beharko dute partaideek). Ondoren, Gure Esku Dago ekimenaren antolatzaileek, Euskal Herrian bost herri izendatu dituzte festaleku gisara. Horietako bat Lazkao izango da (besteak Durango, Bergara, Etxarri Aranatz eta Iruñea dira). 10.000 lagun biltzea espero dute han, 42. kilometrotik 70.erakoak.
    Festa giroko ekitaldiak izango dira, 13:00etatik aurrera: herri bazkaria eta Eskuetan abestiarekin flashmoba, tartean. Honako egitaraua izango da Lazkaon, ekainaren 8an, giza-katearen ondoren:

• 13:30. Goierriko Bertso Eskolako bertsolari gazteak.
• 14:00. ‘Gure esku bidea’ ekitaldia.
• 14:30. Bazkaria, plazako frontoian, mila lagunentzat (15 euro; txartelak aurrez salgai herrietan). Bestetik, paella, taloak eta ogitartekoak ere jarriko dituzte.
• 15:30. Patxin eta Potxin pailazoak, Lazkao Txiki Zelaian.
• 16:30. Mutxiko dantzak, Ramuntxo Zubeldiak gidatuta.
• 17:00. Erromeria, Guri5! musika taldearekin.
• 18:00. ‘Eskuetan’ abestiarekin flashmoba, Oin-Arin dantza taldeak gidatuta.
• 18:30. Erromeria, Guri5! taldearekin.
• 20:00. Jaialdiaren bukaera.
• Egunean zehar: haurrentzat jolas parkea, puzgarriak, tailerrak… (Lazkao Txiki Zelaian). Kale animazioa, musikariak, txarangak, txistulariak, trikitilariak…

• Jatorrizko albistea, Goierriko Hitzan: Gure Esku Dagoren bost festalekuetako bat Lazkao izango da ekainaren 8an